Сингапур дэлхийн алтны төв цэг болох зорилгоор 500 тонн алт хадгалах сан нээлээ

Сингапур улс дэлхийн алтны худалдааны томоохон төвүүдийн нэг болох зорилгоо ахиулж, гадаадын Төв банкууд болон төрийн байгууллагуудад зориулсан алт хадгалах шинэ үйлчилгээг нэвтрүүллээ. Сингапурын Мөнгөний удирдах газар мягмар гарагт танилцуулсан уг үйлчилгээ нь эхний ээлжид 500 тонн алт хадгалах хүчин чадалтай юм. Шинэ үйлчилгээний онцлог нь алтны хадгалалтыг арилжааны компани бус, Сингапурын төв банк өөрөө хариуцахад оршино. Ингэснээр бусад улсын төв банкууд алтны нөөцөө уламжлалт хадгалалтын төвүүдээс гадна Сингапурт байршуулах боломжтой болж байна. Түүнчлэн Сингапур алт хадгалах, цэвэршүүлэх, дахин боловсруулах, сорьц тогтоох, зуучлах зэрэг зарим үйлчилгээг татвараас чөлөөлөхөөр төлөвлөжээ. Мөн алтны арилжааны төлбөр тооцоог хөнгөвчлөх шинэ системийг 2027 оны эхний улиралд ашиглалтад оруулахаар зорьж байгаа юм.

Лондонд Сингапурын шинэ сангийн хүчин чадлаас 20 дахин их алт хадгалагдаж байна Сингапурын хувьд дэлхийн алтны зах зээлд байр сууриа эзлэх нь амаргүй. Тухайлбал, алтны худалдааны хамгийн том төвүүдийн нэг Лондонгийн хадгалалтын байгууламжуудад аравдугаар сарын эцсийн байдлаар 9,850 тонн алт байршиж байжээ. Энэ нь Сингапурын шинэ үйлчилгээний анхны хүчин чадлаас бараг 20 дахин их хэмжээ юм. Үүнээс гадна Хонконг алтны худалдаа, хадгалалтын дэд бүтцээ өргөжүүлж байгаа бөгөөд дэлхийн хамгийн том алтны зах зээл болох Хятадтай ойр байрладаг нь томоохон давуу тал болж байна. “Swiss Asia Capital” компанийн хөрөнгө оруулалт хариуцсан захирал Юрг Кинерийн үзэж буйгаар Сингапур алтны худалдааны томоохон төв болох өрсөлдөөнд харьцангуй орой оролцож байгаа аж. Гэхдээ Хонконгтой шууд өрсөлдөхийн оронд олон улсын санхүүгийн байгууллагуудын алтны нөөцийг хадгалах чиглэлээр давуу тал бий болгох боломжтой гэж тэрбээр тайлбарлажээ.

Төв банкууд алтаа хадгалах шинэ байршил хайж байна Сингапурын энэхүү алхам нь дэлхийн төв банкууд алтны нөөцөө хадгалах байршлаа дахин үнэлж буй үетэй давхцаж байна. Дэлхийн алтны зөвлөлийн есдүгээр сард нийтэлсэн тайланд дурдсанаар геополитикийн хурцадмал байдлын улмаас хэд хэдэн улс сүүлийн нэг жилийн хугацаанд алтны нөөцөө өөр өөр байршилд хадгалах болсон бөгөөд бусад улс ч ийм алхам хийхээр төлөвлөжээ. Дэлхийн алтны зөвлөлийн төв банкуудын асуудал хариуцсан тэргүүн Шаокай Фаны тайлбарласнаар Сингапурын улс төрийн тогтвортой байдал, найдвартай хууль эрх зүйн орчин, олон улсын тээврийн сүлжээ нь алт хадгалах шинэ байршил хайж буй төв банкуудын сонирхлыг татах боломжтой. Нөгөө талаас Азийн алтны эрэлт нэмэгдэж, бүс нутгийн алт цэвэршүүлэх үйлдвэрүүд өргөжсөнөөр олон улсын алтны худалдааны урсгал ч өөрчлөгдөж байна. Өмнө нь алтны томоохон нийлүүлэлт Лондон, Швейцараар дамждаг байсан бол өдгөө Азийн орнууд хоорондоо шууд алт худалдаалах нь нэмэгджээ. Гэхдээ алт хадгалах томоохон байгууламжтай болох нь дангаараа худалдааны төв болох баталгаа биш юм. Сингапур цаашид олон улсын банк, хөрөнгө оруулагчид болон алтны худалдаа эрхлэгчдийг татаж, арилжааны хэмжээгээ нэмэгдүүлэх шаардлагатай. Сингапурын Шадар сайд Ган Ким Ён тус улсын зорилго нь бусад төвүүдээс зах зээлийг булаах бус, төв банкуудад алтны нөөцөө хадгалах илүү олон сонголт бий болгох явдал гэдгийг онцолжээ.