Ажлын ярилцлагад мөстэй кофе барьж очих нь “мэргэжлийн бус” үйлдэл үү?

Ажлын ярилцлагад мөстэй кофе бариад орох нь ажил горилогчийн мэргэжлийн дүр төрхөд сөргөөр нөлөөлдөг үү?

Цахим орчинд өрнөж буй уг маргаан зөвхөн кофе гэхээсээ илүүтэй ажилд авах шалгуур болон үе хоорондын ажлын соёлын ялгааг хөндөж байна.

Маргаан анх есдүгээр сарын 16-ны өдөр нэгэн ажил олгогч өөрийн TikTok хуудаснаа Z үеийн ажил горилогч ярилцлагад мөстэй кофе барьж ирдэг талаар бичлэг нийтэлснээр эхэлжээ. Тэрбээр тус кофе барьж ирсэн ажил горилогчийг ярилцлагад ирэх зуураа кофе шоп орох "завтай" байгаа нь ажлын ярилцлагыг үл хүндэтгэж буйн хэрэг төдийгүй энэ үйлдэл өөрийг нь "хэт энгийн" харагдуулж байна хэмээн үзжээ.

Уг бичлэг баасан гарагийн үдээс хойш гэхэд нийт 465,000 гаруй үзэлт авч, хэлэлцүүлэгч бусад платформд ч тархсан байна. Зарим хэрэглэгч кофе барьж ирсэн эсэх нь ажлын туршлага, ур чадвар болон ажлын ёс зүйтэй огт холбоогүй гэж үзсэн бол нөгөө хэсэг нь асуудал кофенд бус, мэргэжлийн харилцаа үүсэхэд холбоотой хэмээн тайлбарлав.

Өрсөлдөөнтэй хөдөлмөрийн зах зээл

Вашингтонд төвтэй карьер болон манлайллын зөвлөх Фиби Гэвиний үзэж буйгаар уг маргаан өнөөгийн ажилд авах үйл явц дахь ажил олгогч, ажил горилогчийн зөрүүг харуулж байна.

АНУ-ын Хөдөлмөрийн статистикийн хорооны наймдугаар сарын мэдээллээр нийт ажилгүй иргэдийн 27 хувь нь зургаан гаруй сарын хугацаанд ажил хайжээ. Иймээс удаан хугацаанд олон ажлын байранд материалаа илгээсэн хүнийг "кофе барьж ирсэн" гэх мэт жижиг шалтгаанаар үнэлэх нь ажил горилогчдын бухимдлыг нэмэгдүүлж байгааг Гэвин онцлов.

Түүний хэлснээр олон цаг зарцуулан материалаа бэлдсэн, олон жилийн туршлага болон ахисан түвшний боловсролтой ажил горилогчийг кофе барьж ирсэн эсэхээр нь дүгнэж, мэргэжлийн чадварыг нь үл тоож болохгүй аж.

Z үеийн залуус ажлын байрны хуучны хэм хэмжээг сорьж байна Мэргэжлийн сүлжээний “LinkedIn” компанийн харилцаа холбоо хариуцсан дэд ерөнхийлөгч, карьерын шинжээч Кэтрин Фишер уг хэлэлцүүлгийг үе хоорондын ажлын соёлын ялгаатай мөн холбон тайлбарлав.

Түүний хэлснээр Z үеийнхэн ажлын байранд хувийн хэв маягаа илүү илэрхийлэхийн зэрэгцээ үндэслэлгүй эсвэл хуучирсан хэмээн үзсэн байгууллагын хэм хэмжээг үл тэвчих хандлагатай залуус ажээ.

Гэхдээ Z үеийнхэн бусад насны бүлгээс илүү олон удаа ярилцлагад мөстэй кофе авч ордогийг нотолсон баримт одоогоор байхгүй. Харин зарим ажил олгогч залуу ажил горилогчийн ийм үйлдлийг мэргэжлийн бус гэж хүлээн авч, Z үеийн талаарх хэвшмэл ойлголттой холбож болзошгүйг ажилтан зуучлалын “HireQuest” компанийн ажилд авах мэргэжилтэн Жейми Клоуз тайлбарлажээ.

Клоузын хувьд ажил горилогч ямар ундаа барьж ирсэн нь шийдвэрлэх шалгуур биш ба энэ талаар “Хэрэв сайн туршлагатай, чадвартай хүн бол мөстэй кофе авч ирсэн эсэх нь надад хамаагүй” гэж хэлсэн байна.

Ярилцлагад орохдоо юуг анхаарах вэ?

Мэргэжилтнүүдийн зөвлөгөө маш энгийн: эргэлзэж байвал кофегоо гадна үлдээ. Мөстэй кофе барьж очсон нь таны ур чадвартай холбоогүй ч ярилцлага авч буй хүн бүр үүнийг адилхан хүлээж авахгүй. Тиймээс ундаа тань асгарах, чимээ гаргах, анхаарал сарниулах зүйлгүйгээр өөрийн туршлага, ур чадвартаа төвлөрөх нь хамгийн найдвартай сонголт гэж “HireQuest”-ийн ажилд авах мэргэжилтэн Жейми Клоуз зөвлөжээ.

Гэхдээ ярилцлага зөвхөн компани таныг сонгох үйл явц биш юм. Та ч бас тухайн ажлын байр өөрт тань тохирох эсэхийг харж байгаа. Тиймээс ажлын орчин, хувцаслалт, харилцааны хэв маяг, компанийн соёлын талаар асууж болох юм.

Мөн “LinkedIn”-ийн карьерын шинжээч Кэтрин Фишерийн хэлснээр ярилцлагад орохдоо өөр хүн шиг харагдах гэж хэт хичээх шаардлагагүй ажээ. Харин тухайн байгууллагын ажлын хэв маяг танд нийцэх эсэхийг анзаарах нь чухал.

Хэрэв кофе барьж ирсэн гэх мэт жижиг зүйл ажилд авах шийдвэрт нөлөөлж байвал тухайн компанийн соёл танд тохирох эсэхийг бодож үзэх нэг дохио байж болохыг карьерын зөвлөх Фиби Гэвин онцолжээ.