Хүний эрхийн боловсролын хичээлийг зургаан сургуулийн X–XI ангид туршина

Ахлах ангийн сурагчдад хүний эрхийн боловсролыг олон хичээлтэй уялдуулан олгох “Бидний эрх–Бидний амьдралд” гарын авлагыг зургаан сургуулийн X–XI ангид хоёр сарын хугацаанд туршихаар болжээ. Туршилтыг хичээлийн хоёрдугаар улиралд хэрэгжүүлэх талаар Боловсролын судалгааны үндэсний хүрээлэн мэдээллээ.

Бэлтгэл ажлын хүрээнд Сэлэнгэ, Төв аймаг, Өвөрхангайн Хархорин, Хэнтийн Бор-Өндөр сум болон Улаанбаатарын хоёр сургуулийн 30 багшийг арваннэгдүгээр сарын 3–5-нд сургалтад хамруулж байна. Түүх, нийгмийн ухаан, монгол хэл, уран зохиол, байгалийн ухаан, математикийн багш нар гарын авлагын сэдэв, бүтээлч үйл ажиллагааг хичээлдээ турших арга зүй эзэмшиж байгаа аж.

Гарын авлагыг хүний эрхийн ойлголтыг зөвхөн нэг хичээлээр хязгаарлахгүй, сурагчдын бусад хичээлээр эзэмшиж буй мэдлэгтэй холбон заахад зориулан боловсруулж байна. Багш нар сурагчдад баримт, нотолгоонд тулгуурлан хэлэлцэх, бусдыг сонсох, байр сууриа илэрхийлэх боломж олгох арга барил ашиглахаар зорьжээ.

Сургалтыг Боловсролын судалгааны үндэсний хүрээлэн, Хүний эрхийн Үндэсний Комисс, Үндсэн хуулийн цэцийн судалгааны төв, НҮБ-ын Монгол дахь Суурин зохицуулагчийн газар, “Монголын Эмнести Интернэшнл” зэрэг байгууллагатай хамтран зохион байгуулж байна.