Хүннү хотыг эрчим хүчээр хангах “Сэргэлэн” дэд станцыг ашиглалтад оруулжээ

Улаанбаатар хотоос 53 км, Зуунмод хотоос 10 км зайд орших Хөшигийн хөндийд байгуулах Хүннү хотын суурь дэд бүтцийн бүтээн байгуулалтын хүрээнд 220/110/35 кВ-ын “Сэргэлэн” дэд станцыг ашиглалтад оруулжээ. Төслийн барилга угсралтын ажил 2023 оны есдүгээр сард эхэлсэн бөгөөд гурван жилийн дараа буюу 2026 оны есдүгээр сард улсын комисс хүлээн авсан байна.

Нийт 6.4 га талбайд баригдсан “Сэргэлэн” дэд станц нь 250 МВА суурилагдсан хүчин чадалтай, гурван хүчдэлийн түвшинд ажиллах дижитал удирдлага, хяналтын системтэй. Станцад 400 гаруй тоног төхөөрөмж суурилуулсан бөгөөд Хүннү хотын цахилгаан хангамжийг бүрдүүлэхээс гадна бүс нутгийн эрчим хүчний нэгдсэн сүлжээний зангилаа болохоор төлөвлөжээ.

Тодруулбал, тус дэд станц нь 220 кВ-ын шугамаар “Сонгино” дэд станцаас цахилгаан эрчим хүч хүлээн авахын зэрэгцээ Бөөрөлжүүтийн цахилгаан станц болон Сэргэлэн, Городок чиглэлийн цахилгаан дамжуулах шугамуудыг холбох боломжтой юм.

Хүннү хотын зарим дэд бүтцийн ажил бүрэн дуусжээ

Хүннү хотын төмөр замын бүтээн байгуулалт 100 хувь дуусаж, төмөр замын тээвэр эхэлсэн бөгөөд туршилтын ажил үргэлжилж байна. Мөн 41.5 км урт шилэн кабелийн сүлжээ, 35/10 кВ-ын “Хөндий” дэд станц, үерийн хамгаалалтын нэгдүгээр далан сувгийн ажлууд бүрэн дуусаж, улсын комисс хүлээн авчээ. Харин бусад дэд бүтцийн төслийн хэрэгжилт дараах түвшинд байна.

Хүннү хотод цаашид 150,000 оршин суугч төвлөрч, 80,000 ажлын байр бий болгохоор төлөвлөж байна. Мөн “Aerocity” хөгжлийн бүсэд эдийн засгийн чөлөөт бүс, аялал жуулчлал, худалдаа үйлчилгээ, засаг захиргаа, боловсрол, эрдэм шинжилгээ, үйлдвэрлэл, агаарын карго болон логистикийн чиглэлийн бүсүүдийг хөгжүүлэхээр тусгажээ.

Ийнхүү Хүннү хотын цахилгаан хангамж, төмөр зам, мэдээлэл холбоо болон үерийн хамгаалалтын суурь дэд бүтцийн зарим байгууламж ашиглалтад орсон бол хотын ус, дулаан, ариутгах татуургын системийн бүтээн байгуулалт үргэлжилж байна.