Майамид $10 саяас дээш үнэтэй 200 шахам тансаг орон сууц эхний найман сард борлуулагджээ

Майами-Дэйд тойргийн тансаг зэрэглэлийн орон сууцны зах зээл эрчимжиж, өндөр үнийн дүнтэй хэлцлийн тоо өмнөх жилийн түвшнийг эхний найман сарын дотор давсан байна.

“Miami Realtors” үл хөдлөх хөрөнгийн мэргэжлийн холбооны мэдээлснээр наймдугаар сарын эцэс хүртэл 10 сая ам.доллар ба түүнээс дээш үнэтэй 194 орон сууц борлуулжээ. Энэ нь 2025 оны бүтэн жилийн 170 хэлцлээс 14.1 хувиар өндөр үзүүлэлт юм.

Одоогийн борлуулалтын хурд хадгалагдвал энэ онд ийм ангиллын хэлцэл 291 орчимд хүрч, 2021 онд тогтоосон 230 хэлцлийн дээд амжилтыг шинэчлэхээр байгааг тус холбоо тооцоолжээ.

Бэлэн мөнгөний худалдан авалт зах зээлийг дэмжиж байна

Майамигийн тансаг орон сууцны зах зээлийн нэг онцлог нь худалдан авагчид банкны санхүүжилтээс бага хамааралтай байгаатай холбоотой. Тухайлбал, 2025 онд 1 сая ам.доллар ба түүнээс дээш үнэтэй орон сууцны борлуулалтын 82 орчим хувийг бэлэн мөнгөний хэлцэл эзэлж байв.

Швейцарын санхүүгийн “UBS” банкны тооцоолсноор бэлэн мөнгөөр хийх худалдан авалтын өндөр хувь нь тансаг зэрэглэлийн зорилтот бүлгийг ипотекийн зээлийн хүү болон санхүүжилтийн өртгийн өсөлтөд харьцангуй тэсвэртэй байхад нөлөөлж байна.

Тус банк Майамигийн үл хөдлөх хөрөнгийн хөөсрөх эрсдэлийг өмнөх жилийн хамгийн өндөр ангиллаас 2026 онд “өндөр” түвшин рүү бууруулжээ. Өндөр татвар, амьжиргааны өртөгтэй бусад мужаас чинээлэг иргэд шилжин ирж байгаа нь орон сууцны эрэлтийг дэмжиж байгаа тул ойрын хугацаанд зах зээл даяар үнэ огцом буурах эрсдэлийг “UBS” харьцангуй бага гэж үзсэн байна.

Өргөн хэрэглээний зорилтот бүлэг өөр дүр зурагтай байна

Тансаг зэрэглэлийн зах зээл идэвхтэй байгаа ч Майамигийн орон сууцны зах зээл бүхэлдээ ижил чиглэлд хөдөлж байгаа мэтээр үзэхэд өрөөсгөл. Орон сууцны өндөр үнэ болон зээлийн өртөг худалдан авагчдын хүртээмжийг хязгаарласнаар инфляцаар засварласан орон сууцны үнэ жилийн өмнөхөөс 1.6 хувиар буурчээ.

Ингэснээр Майамид хоёр өөр чиг хандлага зэрэгцэж байна. Чинээлэг худалдан авагчид болон бэлэн мөнгөний хэлцэл тансаг хэрэглээг дэмжиж байгаа бол санхүүжилт шаардлагатай өрхүүдэд өндөр зээлээр орон сууц худалдан авах боломжийг хязгаарласаар байна.

Тансаг автомашины брэндүүд орон сууцны зах зээлд өрсөлдөж байна

Өндөр орлоготой худалдан авагчдын эрэлт нэмэгдэхийн зэрэгцээ автомашины тансаг брэндүүд Майамигийн үл хөдлөх хөрөнгийн зах зээлд идэвхтэй нэвтэрч эхэлжээ.

Францын тансаг автомашины “Bugatti” брэнд өнгөрсөн долоо хоногт АНУ дахь анхны брэнд орон сууцны төслөө Майамигийн Брикелл дүүргийн далайн эрэгт хэрэгжүүлэхээр зарлав. Майамид өмнө нь “Porsche”, “Aston Martin”, “Bentley”, “Mercedes-Benz” зэрэг автомашины брэндийн нэртэй орон сууцны төслүүд хэрэгжиж байжээ.

Үл хөдлөх хөрөнгийн “Prosper Group”-ийн Жэй Робертс Майамиг “Баялгийн шилжилт хөдөлгөөний дэлхийн гол төв” хэмээн тодорхойлов. Чинээлэг худалдан авагчдын шилжилт хөдөлгөөн, бэлэн мөнгөний өндөр оролцоо болон брэндийн шинэ төслүүд нийлж, Майамигийн тансаг орон сууцны зах зээлийг өргөн хэрэглээний бүлгээс улам ялгаатай чиглэлд хөдөлгөж байна.