БНСУ-д монгол иргэд жолооны онолын шалгалтаа эх хэлээрээ өгөх боломжтой боллоо

Аравдугаар сарын 29-нөөс эхлэн БНСУ-д амьдарч, ажиллаж буй монгол иргэд тус улсын жолооны үнэмлэхийн онолын шалгалтыг монгол хэлээр өгөх боломжтой боллоо. Харилцан тохиролцсоны дагуу Монголд байгаа солонгос иргэд ч Улаанбаатар хотод жолооны онолын шалгалтаа солонгос хэлээр өгч болно.

Энэ шийдвэр БНСУ-ын Ерөнхийлөгч Ли Жэ Мёны долдугаар сард Монгол Улсад хийсэн төрийн айлчлалын үеэр байгуулсан «Богино хугацааны зорчигч тээврийн хэрэгсэл жолоодох болон жолоочийн үнэмлэхийг харилцан хүлээн зөвшөөрөх, солилцох тухай» Засгийн газар хоорондын хэлэлцээрийн хүрээнд хэрэгжиж байна. UBN-ий мэдээлснээр, БНСУ-ын жолоодох эрхийн шалгалтын 27 төвд онолын шалгалтын 1,800 асуултыг монгол хэлээр орчуулжээ.

Монгол, БНСУ-ын Засгийн газар хоорондын хамтарсан хорооны 10 дугаар хуралдаан 10 сарын 30-нд Сөүл хотноо болж, ЗГХЭГ-ын дарга Б.Энхбаяр, БНСУ-ын Гадаад хэргийн дэд сайд Ким Жин А нар даргалсан. Zogii.mn-ийн мэдээлснээр, талууд хоёр орны Иж бүрэн эдийн засгийн түншлэлийн хэлэлцээрт ойрын хугацаанд албан ёсоор гарын үсэг зурах, уул уурхай, ховор металл, тээвэр, дэд бүтэц, хот байгуулалтын салбарт хамтын ажиллагааг эрчимжүүлэхээр тохиролцжээ. Мөн хоёр улсын Гадаад харилцааны яам, хил, цагаачлалын байгууллагуудын хооронд «2+2» консул, цагаачлалын яриа хэлэлцээг шинээр байгуулахаар болсон бөгөөд дэд сайдын түвшний эрүүл мэндийн зөвлөлдөх уулзалт найман жилийн дараа сэргэсэн байна.

Б.Энхбаяр эх хэлээрээ шалгалт өгөх нь иргэдийн замын хөдөлгөөний дүрмийн мэдлэгийг сайжруулж, шалгалтад тэнцэх боломжийг нэмэгдүүлнэ гэж онцолжээ.