Г.Дамдинням: Шатахууны үнийг бууруулах саналыг ирэх долоо хоногт Засгийн газарт танилцуулна
Шатахууны нийлүүлэлт арваннэгдүгээр сард харьцангуй нэмэгдэж, арванхоёрдугаар сард цаашид сайжрах хүлээлттэй байгааг салбарын сайд онцолжээ.
Аж үйлдвэр, эрдэс баялгийн сайд Г.Дамдинням шатахууны үнийг тогтворжуулах, бууруулах арга хэмжээний саналыг ирэх долоо хоногийн Засгийн газрын хуралдаанд танилцуулахаар ажиллаж байгаагаа мэдээллээ.
Тэрбээр шатахууны нийлүүлэлт долоодугаар сараас хойш хүндрэлтэй байсныг дурдаад арваннэгдүгээр сард хангамж харьцангуй нэмэгдэж, арванхоёрдугаар сард цаашид сайжрах хүлээлттэй байгааг онцолжээ.
Өмнө нь тэрбээр АИ-92 шатахууны үнийг тодорхой хэмжээгээр, тухайлбал 100 төгрөгөөр ч атугай бууруулах боломжийг судалж байгаагаа мэдэгдсэн. Гэхдээ шатахууны үнийг хэдэн төгрөгөөр бууруулах, ямар механизмаар хэрэгжүүлэх, хэзээнээс мөрдөх талаар эцсийн шийдвэр гараагүй байна.
Иймээс Засгийн газраас танилцуулах тооцоолол, шийдвэрийн дараа шатахууны жижиглэн худалдааны үнэд гарах бодит өөрчлөлт тодорхой болох юм.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
