Энэтхэг Монголын коксжих нүүрс, уран, газрын ховор элементийг импортлох сонирхлоо илэрхийллээ
Тавантолгойн коксжих нүүрснээс нэг тонн дээж авч шинжилж буйг Энэтхэгийн Элчин сайд мэдээллээ. Энэтхэгийн 1.7 тэрбум ам.
Энэтхэгийн тал Монголын коксжих нүүрс, уран, газрын ховор элементийг импортлох сонирхолтой байгаагаа илэрхийллээ. Тэргүүн Шадар сайд бөгөөд Эдийн засаг, хөгжлийн сайд Ж.Энхбаяр арваннэгдүгээр сарын 12-нд Энэтхэгээс Монгол Улсад суугаа Элчин сайд Атул Малхари Готсурветэй уулзах үеэрээ худалдаа, хөрөнгө оруулалт болон хамтарсан төслүүдийн талаар хэлэлцсэн байна.
Элчин сайдын мэдээлснээр, Тавантолгойн коксжих нүүрсийг Энэтхэгт экспортлох бэлтгэл ажлын хүрээнд нэг тонн дээж авч шинжилж байна. Тэрбээр мөн Монголоос уран, газрын ховор элемент импортлох сонирхол өндөр байгааг онцолжээ.
Хоёр улсын хамтын ажиллагааны томоохон төсөл болох газрын тос боловсруулах үйлдвэрийг 2028 оны хоёрдугаар сард ашиглалтад оруулахаар төлөвлөж байгааг Элчин сайд энэ үеэр мэдээллээ. Төсөл Энэтхэгийн Экспорт-Импортын банкны 1.7 тэрбум ам.долларын хөнгөлөлттэй зээлийн шугамаар санхүүжиж байгаа бөгөөд үйлдвэрийн боловсон хүчнийг бэлтгэх хүрээнд монгол инженерүүдийг сургаж байгаа аж.
Боловсрол, технологийн чиглэлд хэрэгжиж буй хоёр төслийн хугацааг мөн танилцуулсан байна. ШУТИС-ийн талбайд баригдаж буй мэдээлэл, харилцааны сургалтын төвийг дөрвөн сарын дараа нээж, жилд 1,000 залууг мэдээллийн технологийн чиглэлээр сургах боломж бүрдүүлэхээр төлөвлөсөн байна.
Харин нэг ээлжид 1,200 хүүхэд суралцах хүчин чадалтай Энэтхэг–Монголын найрамдлын сургуулийг хоёр сарын дараа ашиглалтад оруулахаар төлөвлөжээ. Тус сургууль Энэтхэгийн Засгийн газрын буцалтгүй тусламжаар баригдаж байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
